Milk Shop

‘ yar thank god kal chutti hogayee, itney din se off nahin mila, saarey saturdays bhi client pe nikal gaye aur sundays ko classes khoon choos leti hain’ , Ali ne bezaar ho kar boht chirchiree awaz mein kaha.

‘haan teri tou classes bhi chal rahee hain na! dekh aaj mahiney baad jaldi ghar jaa rahe hain’, mein ne us ki taraf dekhai beghari kaha.  ‘Yar kal subah tou tu dair se uthay ga, hai na?’

‘Haan yar, neend hee nahin puri horahee, raat ko ghar jao tou thakan itni hoti hai ke uth ke nahaney ka bhi dil nahin kerta, phir jab tak thori dair kuch apni marzee ka na ker lo tou sukoon nahin milta!’

‘kya matlab?’

‘ kuch dair TV dekh lia ya internet pe kuch surfing ker lee’

‘abay yar yaad hai jis din hum airport pe dair tak rukey they aur foran haalaat kharaab ho gaye they?’

‘haan pichley mahiney na jab poori team tere flat pe ruki thee?’

‘haan, uss din ek bajey ghar pohnchey tou paros waali aunty apni beti ke saath kisi shaadi se waapis aa rahee thee, uss kee beti waisay tou munasib hai lekin uss din bari fit lag rahee thee, tou uss ne mujhe Hira aur Erum ke saath ghar mein ghusstey huay dekha tou ghoor ghoor ke dekhne lagee! ’

‘Hamza nahin thaa saath?’

‘woh neechay dukaan pe credit ke liye ruk gya, tou phir jab next week ami aayee thee do din ke liye, aunty ne ami ko bta diya ke raat ko do larkiyan aayee thee aap ke betey key saath’

‘ha ha ha’

‘meri aisee jali jab ami ne mujhe btaya. mein ami ko waisey hee bta chuka tha hum rukey they aur aunty ko pata tha key uss din meri behn bhi thee ghar pe’

‘chal mujhe yahan drop ker dey’

‘yahan?’

‘nahin, thora aagey sector office ke saath!’

‘yar sub sector offices target ho rahey hain, tu dur rehna in sey’

‘abay yaar kya karein. chal sahee hai phir miltey hain parson!’

‘okay bhai Allahafiz’

Ali ko uss ke ghar ke qareeb chor ker mein ne U-turn liya aur 20 minute mein apney apartment ki parking mein phnch gaya. In dinon election campaigning apney urooj pe thee aur mulk kee tamam partiyan apney apney jalson mein awaam sey naye aur puraaney waadey ker rahee theen jin pe shayad kiraaye ki awaam ko yaqeen bhi tha. Mukhtalif intikhaabi nishaan haath mein liye party ke leader logon ko vote deney ki talqeen kertey rahe. Deewaron pey her tarah ke intikhabhi nishaan baney nazar aatey aur sarkon pe lagey bill boards per beshumar muskuratey chehrey dikhey. ek jaga deewar pe Sher aur Baley (Bat) ka nishaan iss andaaz mein bna hua tha ke sher kee dum ke bilkul peechey baley ka aadha handle bna hua tha, shayad kisi kaarkun ne yeh tasveer adhuri chor dee thee aur uss ke zehen mein koi nazeba tarkeeb thee jo woh puri na ker paya. Mein, Ali aur Hamza issey dekh ker boht hansey.

Purey 6 bjey mein ne ghar mein qadam rakha. Maryam, meri behen , abhi tak hospital se waapis nahin aayen theen. Ussi raat 9 bajey ke kareeb ek aur sector office ke kareeb do dhamakey huay aur khabron ke mutabiq 3 jaanein zaya ho gayeen. yeh dhamakon ke silsiley mein Karachi mein shayad saatwaan dhamaka tha. jaisey jaisey elections kareeb aarahey they , sheher ke haaalaat bigartey gaye. agley din ke liye soug ka elaan ker diya gaya aur tamam taajiron aur transporters se taawun kee appeal ki gayee. meri tou waisay he chutti thee office se magar Maryam ko shayad hospital  jana tha. uss ney mujey bohat kaha ke subah ke liye cheezain le aao hosakta hai kal sakht hartaal hojaye, ghar mein koi sabzi bhi nahin hai, ek andaa tak nahin para. aakhir haar ker 10 bje mein neechay utra. doodh waaley ki dukaan pe pohncha tou itna rush ke  loug ghuss ghuss ke jaldi sey aagey barh rahey they.

ek aur jang mein hissa leney ke liye na chaahtey huay bhi mein ja ghussa. baqi tamam dukaanein taqreeban band kerwa dee gayeen theen aur iss dukan ka maalik bhi bechaini sey jaldi jaldi logon ko faarigh kerney ka khwaahishmand tha.ek bulb ke illawa dukan ke baqi tamam beroni lights band kerwali theen. mein rush mein khara jamaaiyan leta raha aur susti se haath hilata raha. thori dair baad bhi mein wahin tha jahan thori dair pehle khara tha aur rush barhta jaa rha. ek shakhs itne rush mein bhi cigarette pee raha tha, woh bhi hujoom ke beech mein kharey hokey. shakal se koi gangster laga , lambey baal aur barhi huee shave aur moonchein dekh ker mujhe yaqeen tha ke ye koi party ka banda hai. rush mein hiltey hiltey woh mere barabar aa khara hua aur suta lagata raha. ek suta laga ker uss ney haath neechay kiya tou 5 seconds baad meri cheekh nikal gayee aur mein uchal para. uss shakhs ne jab cigarette neechay ki tou woh mere nafees trouser per aa laagi aur merey sensitive organs ko  jala dala. aur mein cheeekhta raha. dar ke maarey mujhe khatarnaaq khayaalat aaney lagey aur mujhe apni progeny ki fikr huee.

Baad mein pata chala ke minor burn hai aur doctor ne aitmaad se kaha:

‘everything is safe’

mein ne poocha : ‘including my progeny?’

doctor ne hanstey huay jawab dya: ‘it didnt even touch your progeny!’

 

uss din ke baad aur bhi dhamaake hotey rahe, log martey rahe , cigarettein jaltee raheen aur mein chilaaye beghair doodh leta raha