Existence

Garajtey baadalon ney rona shuru kia jaise koi maan apney betey ko daant-te daan-te rona shuru kerdey. Jaisey hazaaron ghoray maidaan-e-jang mein dor rahey hon, baarish ki awaaz ne mujhe chonka diya. kuch hee dair mein muhallay ki galiaan konon mein para kachra ley ker behne lageen. wohi galiaan jin mein uss ka raaj tha. nojawan chehron pey mout sirf neend jaisee lagti hai. dekhney wala heraan na ho agar achanak se ek mara hua nojawan admi uth bethey. hum is intezaar mein they key baarish rukey aur hum janaza parhein. uss ne unees-so- chyanvey mein party mein daakhlaa kiya. bara jaan-daar larka tha. rozana shaam body-building kiya kerta apney gym mein. yeh gym iss kee party ka adda bun gya tha. party ke saarey member yahin pey mila kertey. kuch saal pehly Shah Sahab bhi iss town mein aaye they, sub larkon sey miley aur bataya ke election mein kaisey kaamyabi haasil kerni hai. woh party ke iss unit ka incharge tou na tha magar uss kee jasamat aur roab ko dekh ker loug usey incharge hee samajhtey they.

woh Shah Sahab ki boht izzat kerta tha aur jab bhi Shah Sahab koi khitab kertey zarur unhein sun-ney jata. ussey bhi Shah Sahab ki tarah yaqeen tha in ke logon ke saath soteyla sulook kiya jata hai. kabhi Shah Sahab key kisi nazarye se ikhtilaaf na kiya. aur koi kitaab parhi ho ya nahin, Shah Sahab ki likhi huee donon kitabain barey shoq se parhta tha.

uss  ney kiraye ki ek jaga ley ker apna gym banaya aur ussee sey paisey kamaata tha. chotey chotey larkon ka body-building ka shoq dekh ker ussey boht khushi hoti aur woh bari lagan ke saath in ko jism banaaney ke tareeqay sikhata. her raat gym band ker key seedha apni ami ke haath ka paka khana khata aur phir chat pe jaa ker chaarpaai pe lait jata. aasmaan mein taarey itney kam kyun hain, aksar aasman sey poochta. do teen cigarette pee ker so jata. ek raat aisee aayee key jab woh ghar pohncha, ya pohnchaya gaya tou logon ne dekha key uss ka chora seena khoon se laal hai. sirf do goliaan lagee theen. haath mein gym ke darwaaze ka taalaa tha. kisi ney abhi tak liya kyun nahin, shayad woh soch raha tha.

ghusul diya gaya. uss kee baghal ke baal kafi barhey hoaey they. sufaid rang ke kaprey mein lipta hua pursukun neend so raha tha, jaisey ek bacha jissey dunya mein aaye huay kuch ghantay huay hon, apni maan ke doodh pee ker sota hai. kuch dair pehley woh bacha nahin hota ab woh hai. kuch dair pehley woh tha ab woh nahin hai. hona aur na hona, kiya in donon mein boht zyada farq hai? ek minute ke liye socha jaaye tou shayad andazaa ho ke hamaara hona aur na hona baraabar hain ya nahin. nahin hona aisa hai jaisay kabhi nahin tha aur hona aisa jaisay hamesha sey tha, tab sey jab pehli dafa zameen ghoomee, jab pehli dafa baarish barsee, jab pehli dafa darya bahey aur lehrein utheen. magar honay aur na honay mein waqt ka farq itna hee hai jitna dil kee do dharkanon mein hai. aur na hona hai aisa ke phir kabhi na hoga.

baarish ruki tou qabar khodee gayee. ab kisi ne poocha ke janaza kyun nahin parha ja raha. kisi aur ne kaha ke Shah Sahab ka intizaar hai. loug bethey rahey. kaafi waqt guzra, logon ney israr kiya ke ab namaz parh lee jaaye. Shah Sahab asal mein kahin golf khel rahey they. unhein kisi ney khabar dey dee thee. yeh sun ker unhon ne cigar moon se nikala aur apna sir hila ker wapis honton mein daba diya. khabar deney wala samjha key Shah Sahab janaazey mein shirket karein gey tou uss ney aagey bhi logon ko bataya. loug ab intezaar na ker sakey. aur uth kharey huay. buzurgon ney bhi issi ko sahi samjha.

namaz parhee gayee. kuch logon kee aankhon mein motey motey aansu thay. shayad yeh loug iss ke chotey bhai they ya phir uss ke dost jinhein woh body-building sikhata. ek insaan ka dil nihayat mushkil sey dharak raha tha. uss insaan ke dil ke chaaron goshon mein woh basar kerta tha. uss insaan nein ussay janam diya tha, boht saal pehley. 

ab aisa waqt aya jo uss ke chahney walon ke liye boht mushkil tha. ussey qabar mein utara gaya. baarish phir girney lagee. muthee bhar bhar ke logon nein ussey dafna diya. phir sab apney apney ghar chaley gaye.

kuch dair pehley woh tha ab…!

 

.

.

.

.

.

.

.

Advertisements

6 thoughts on “Existence

  1. This was,.. captivating.
    “magar honay aur na honay mein waqt ka farq itna hee hai jitna dil kee do dharkanon mein hai.” True that.
    I think about it. A lot.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s